الحرب الإيرانية الإسرائيلية وتأثيرها على قطاع اللوجستيات ..
ahmed ibrahim
بعد اندلاع الحرب بين إيران وإسرائيل بدأت إيران تظهر نبرة شديدة اللهجة فيما يخص غلق مضيق هرمز ودي حاجة لو حصلت هيكون تأثيرها كارثي على العالم كله وهنعرف التأثير دا بالتفصيل دلوقتي، بس قبل ما نعرف التأثير هوضح بشكل مختصر نبذة عن مضيقي هرمز وباب المندب لأن دي حاجة مهمة جدا إننا نعرفها علشان نربط الأحداث مع بعض.
مضيق هرمز
دا المضيق البحري اللي بيربط بين بحر العرب والمحيط الهندي والدول اللي بتشرف عليه هما إيران وسلطنة عمان، وأهمية المضيق الاستراتيجية جاية من إنه بيعدي منه أكثر من ثلثي إنتاج النفط في العالم وما يقارب من 25% من إنتاج الغاز ودا رقم ضخم لو المضيق اتقفل فدا هيسبب كارثة على العالم كله وهيخلي أسعار النفط تقفز بشكل جنوني وممكن تتجاوز حاجز ال 150 دولار للبرميل الواحد وطبعا ما يتبعه من حدوث أزمة طاقة للعالم أجمع ناهيك عن التأثير الكبير على شركات وخطوط الشحن اللي بتمر من المضيق.
مضيق باب المندب
مضيق باب المندب لا يقل أهمية عن مضيق هرمز، والمضيق دا اللي بيربط خليج عدن والي بيربط بدوره مع المحيط الهندي وبين البحر الأحمر ومن ثم قناة السويس، والدول اللي بتشرف عليه هما اليمن وجيبوتي، المضيق دا هو بوابة البحر الأحمر الجنوبية واللي بيربط بين دول شرق آسيا وأوروبا وبرضو زي ما ذكرنا في مضيق هرمز ان شاحنات النفط والغاز بعد ما بتعدي من مضيق هرمز بيعدي الجزء الأكبر منها من باب المندب وبعدها قناة السويس.
شركة مباشر
• *إيه وجه الترابط بين المضيقين؟؟* اللي بيربط المضيقين هو رابط سياسي أكثر منه جغرافي، لأننا زي ما ذكرنا اللي بيشرف على مضيق هرمز هي إيران واللي بيشرف على باب المندب هي اليمن وبيجمعهم جماعة الحوثيين اللي بيتم دعمها من إيران وليها تأثير قوي على حركة الملاحة في باب المندب وبالتبعية البحر الأحمر، فلو افترضنا جدلا غلق المضيقين فدا يعتبر خنق للعالم كله.
• *هل غلق مضيق هرمز خيار وارد فعلا؟؟* أنا شايف إن غلق مضيق هرمز هو خيار صعب جدا ودا لأن داخل فيه تبعات كبيرة وتأثيره على العالم أجمع مش دولة بعينها، دا غير إن أمريكا وغيرها من الدول قد تتدخل عسكريا في حالة تنفيذ الخيار دا ودا زي ما ذكرت فوق علشان تأثيره الكبير جدا على قطاع الطاقة العالمي بالتحديد.
• إيه التأثير على شركات الشحن المصرية وبالأخص (اسكندرية للحاويات، القناة للتوكيلات الملاحية، دمياط لتداول الحاويات، بورسعيد لتداول الحاويات)؟؟ ممكن نقسم تأثير الحرب دي ما بين تأثير إيجابي أو سلبي أو كارثي وهنشرح بأي شكل ممكن تتأثر شركات الشحن بالحرب الإيرانية الإسرائيلية.
التأثير الإيجابي
ممكن يبان إنه صعب يكون فيه تأثير إيجابي من الحرب على شركات الشحن، بس دا خيار وارد ودا في حالة إن أسعار الشحن ترتفع ودا بيحصل دلوقتي بالفعل ولكن بنسبة أعلى من إنخفاض عدد الشحنات المارة عبر المضيقين وبالتبعية قناة السويس.
التأثير السلبي
التأثير السلبي هيطول الشركات دي في حالة إنخفاض عدد الشحنات المارة ودا بيحصل بالفعل دلوقتي وارتفاع أسعار الشحن، بس الارتفاع دا ميعوضش إنخفاض الكميات.
التأثير الكارثي
ودا اللي هيحصل في حالة غلق إيران بالفعل مضيق هرمز واللي هيمنع بدوره كميات هائلة من السفن من المرور في البحر الأحمر وقناة السويس، ومع ذلك دا هيفضل خيار مستبعد شوية ووضحنا فوق ليه.
_*وجب التنويه أنه حتى ألان لم يحدث انقطاع في امدادت النفط ولا يوجد تأثير ملحوظ حتى ألأن على شركات الشحن المصرية جراء الحرب الإيرانية الإسرائيلية*_ .
