فن و ابداع

” عبد الله محمد” يكتب: ”كوبايتين الشاي“

”كوبايتين الشاي“

أول تلميذ قرر يطلع..

على سطح المدرسة من غير خوف

كان ينفع شاعر، يا خسارة..

خرزانة الناظِر مش بتشوف

أول عربيّة رَشّ ناموس..

فاتت في شارعنا بقالها سنين

كانت إنذار للبني أدمين:

لازم نتعلم كلنا نجري في نفس الناحية

ونزوِّد حصّة عشان نتعلم حدف الطوب

أول طيارة تفوت في الجوّ

شاورو عليها الأطفال.. إلا الطفل المرعوب

كات بالنسبالُه الطيارة تمهيد لحروب

أوقات بتعدي علينا حاجات ومابنشوفهاش..

مابنلمحاش علشان الوقت بسرعة سرقنا

الشمعة بتسهر ويّانا؟

ولّا احنا بنسهر ويّاها خايفين تحرقنا!

أوقات بتعدي علينا حاجات ومابنشوفهاش

ادخل من شارع فاضي ماحدِّش داخل فيه

أحسن ما يدوسو عليك وكأن ماحدِّش شافَك

شِيل إيدَك من على ضهر اللي بيتصوّر جنبك

..شِيلُه على اكتافَك 

علشان لو شاف الصورة يبص عليها شويه

وكمان يقرأها كأن كلام مكتوب في عينيك

الصورة الوحشة ماتمسحهاش..

دي أكتر صورة بتشبه ليك

ماتخافش من الكلب السايب..

خاف م المربوط،

خاف م المغلوب

اِعترف انه أقوى من الباقي

اِعطي الأشياء حقها علشان هيجيلك دور

فيه وقت هتبقى انت المحتوى وانت الجمهور

هيجيلك يوم وماحدِّش يسمع عنّك فيه

واللي انت قضيت عمرك تبنيه..

هيطير في ثواني 

ومفيش حاجة هتشفعلك غير موقف إنساني

أوقات بتعدّي علينا حاجات وما بنشوفهاش..

ما بنلمحهاش 

أسمنت وطوب ومحارة وناس شقيانة كتير

لكن التسقيف في الأخر بيروح للنقّاش!

السر هيفضل دايمًا على وش الفنجان..

مش طعم القهوة

السر هيفضل جوه حاجات

بتعدّي في سهوة..

اِعطي الأشياء حقها كامِل

حوالينا بيوت وعماير حلوة بَنوها ازاي؟

السر في كوبايتين الشاي 

مش في الهندسة ولا في الصنعة..

ولا خِفّة إيد العامِل

اِعطي الأشياء حقّها كامِل

الشاعر عبد الله محمد ألمظ
الشاعر عبد الله محمد ألمظ

 

الشاعر عبد الله محمد ألماظ

حاصل على جائزة الدولة التشجيعية 

زر الذهاب إلى الأعلى
Verified by MonsterInsights