نجوى فؤاد: لبس البنات كله ابتذال

تحدثت نجوى فؤاد عن رأيها عن راقصات الجيل الحالي واعتراضها على جرأة بدل الرقص المتواجدة الآن.

قالت نجوى فؤاد: “كل واحدة من الراقصات سواء لوسي أو دينا أو فيفي عبده، أحب رقص لوسي ودينا، فيفي تطلع على المسرح تشدك، عندها كاريزما، كل واحدة فيهن لها لون وطريقة، وكلنا كنا مختلفين عن بعض وكلنا ناجحين، حاليا الموجودات أوكرانيات وقلت من قبل أنهن زي فراخ الجمعية”، وذلك حسب تصريحاتها لبرنامج “شاي بالياسمين” الذي تقدمه ياسمين الخطيب عبر شاشة “النهار”.

وتابعت: شكلهن جميل جدا ويتلووا جامد جدا وبيتمرنوا كويس أوي، وبيصرفوا على بدلهم مع إنها بدل عارية شوية، وأنا ضد دا دلوقتي، أنا اللي عملت الغطا الفوال والشبك والحاجات دي، كان الأول بيغطوا الحتى دي بخرز ونجمة، كان أيامها مدير الرقابة يحيى حقي، وقولت له كدة ماينفعش، الشكل رخيص، ورسمت له دا وقدمته على الماكيت، واتوافق عليه واتنفذ، وكلنا التزمنا به، الممنوع مرغوب ولو حتى بفوالا (قماش شفاف)، تبقي عايزة تقطعي القماشة تشوفي تحتها إيه، لكن تطلعي كدة، ما باينة عادي، التغطية بتجذب أكثر.

وأضافت: زمان أول ما بدأ الرقص كان بلبس عربي البدوي والتوب والتلي الصعيدي اليدوي، مكنش في بدلة رقص، بدل دلوقتي بتاعت بكيني بتاعت شاطيء مش راضية عنها، لا ديننا ولا تقاليدنا ولا عاداتنا كدة، وزمان مكنش عندي وعي السنين دي كلها، ولو رجع بي الزمن مش هلبس بدلة رقص، أنا كنت عايزة اشتغل اي شغلانة عشان مكنش معايا فلوس، كنت عايزة فلوس، ولو رجع بي الزمن معملش دا كله، إغراء وجلب المادة.

واستكملت نجوى فؤاد: الآن في الأفراح والمناسبات بنات العائلات بيرقصن بطرق مبتذلة، والملابس ابتذال ثم ابتذال ثم ابتذالات، لا أستطيع الحديث عن الحركات لإن دا إحساسها.

يذكر أن نجوى فؤاد مرت مؤخرا بأزمة صحية كبيرة، ونقلت إلى المستشفى لإجراء الفحوصات الطبية، وأجرت الفحوصات اللازمة وما أن اطمئن الأطباء على صحتها غادرت المستشفى وعادت إلى منزلها، وطلبت من جمهورها الدعاء لها، بحسب تصريحاتها لجريدة الوطن.